星島日報 陸羽仁 大市守在22500點以上，未有像樣回吐，甚有在2 2 0 0 0 點上整固打底的感覺，上海A 股上周四跌5 . 2 % ，大市「正常」應該跌多的，但恒指周四由升轉為少升就算交差，周五早段 曾下挫，但很快便倒升，收市更大漲2 7 8 點。 在這種市況，有貨和無貨的心境很不同。若無貨在手，或者貨不夠，就會好想股市大幅回吐，讓他們可以追番貨。若有貨在手，進取者當然會愈睇愈高，保守者就驚跌市就到，時時想跳車。 買落後股都有風險 可以講吓追貨，早兩日有網友問起依家買貨，算唔算高位追貨。老老實實，大市在22000點，點計都係貴，依家追貨，特別係追熱門股，當然係買緊貴貨，買貨要知貴也。 高追當然不如低吸好，這是阿媽係女人的道理，問題有無平貨可買，要買平貨，只有兩個可能，第一是大市急回，落番一兩場大雨，咁就熱門股都會平番啲(到時散戶亦唔敢買)。第二是買落後股，人升佢唔升嗰種，博將來追番落後，炒番一轉。 先講第一種可能，要大市急回，即係回落800點到1000點的大調整，在這種「開車市」中，無咁易出現，出現時若回得急，亦可能係跌市的開始。第二種可能係買落後股，不過買落後股都有買落後股的風險。 旺市追熱股非敲冷股 講起落後股，好自然就諗起滙豐(005)或者和黃(013)，我同一班中環茶友傾偈，講起滙豐月底公布業績，唔知有無得借勢炒一轉，大市向上，點講滙豐都會升一升；但有一個老友就非常反對，話滙豐的確落後，但即使升升得幾多？升到152元已經創新高，升一成都唔夠，你買熱門股中移動(941)、中石油(857)或者中海油(883)，借住上A股之勢，再升一成絕對唔奇，佢話旺市要追熱門股，唔係敲冷，因為要升熱門股升先，但跌起上來冷門股一樣會跌。 老友講法有道理，所以敲冷買滙豐，亦只宜穩陣派去做，如果你成日驚跌市明天就到，但手上完全無貨又好想買股票，買了滙豐咁唔好彩遇上跌市，都輸你唔死的。講來講去指向一個方向，升市要買股，平嘢無好，要買就買貴嘢，陸羽仁成日叫人唔好高追，咁就唯有收工齋睇？ 若現雙頂小心急回 我唔敢叫人高追，咁講實被網友鬧，只能描述一下高追面對的風險與機會。大市在22000點以上，升和跌的幅度相若，即係話升多1000點又得，跌1000點亦得，值博率變得一般，只是一個一博一的遊戲。高追當然係博大市再升，走一轉。進入「開車市」之後，升市好多時來得好急，有時更會升到你唔信。情況會係咁，大市開車後，先來一輪急抽，跟住就整固，整固一輪之後，又會再抽第二轉，甚至第三轉，到升到高位衝極都衝唔穿，上上落落，來一個雙頂，甚至三頂，就要小心大市急回了。 在大市升第一轉時，會殺你一個措手不及，好多人拒絕相信，覺得已見頂，又或者相信未見頂，但深信會深度調整，所以繼續不入市，但整固完升第二轉時，樂觀情緒開始蔓延，好多人開始信，反而在那時更高位追貨的人更多，這就是我講愈高愈多人追的現象。 追貨要識「高買高賣」 高位追貨的危險，第一是買時已是摸頂，一買完就回，然後坐艇到尾。第二是買時已是中高點，買完升了一兩個浪，但無食胡，結果又坐艇。所以我奉勸高位追貨的朋友，要抱「高買高賣」心態，貴股係買來沽的，唔係買來坐的，買了貴股，馬上要度吓甚麼時機可以出貨，例如買中移動，等佢上A股之日，唔沽晒都起碼沽一半，換另一隻排緊隊上A股的股票。在旺市買股，是一個扑傻瓜的遊戲，明知自己買貴貨，買入只係想在更貴時賣俾人，如果猶猶豫豫，有胡唔食，睇埋報紙聽埋專家講嗰的基本因素，係咁坐貨，唔知自己入價好高，咁就輸晒都未天光。 你一日未沽貴貨，你仲係接貨嗰個傻瓜，你在二元買了中石油，即使佢升到好顛，唔沽絕對無壞，可以長揸一二十年。但如果你在12元買中石油，有咁上下利潤就要食胡，起碼都定番個止賺位保住利潤，唔好扮長綫坐到尾呀。